हेटौंडाः देशमा आर्थिक सङ्कट बढ्दै जाँदा संघीय सरकारले स्थानीय तहमा पठाउने अनुदान कटौती गरेको इन्द्रसरोबर गाउँपालिका अध्यक्ष देवकृष्ण पुडासैनीले बताउनुभयो । पालिकामा संघीय सरकारले बजेट कम पठाएको र राजस्व पनि कम संकलन भएको उहाँले बताउनुभयो ।
पालिकाले चालु आर्थिक वर्ष २०७९–२०८० मा ३ करोड राजस्व संकलन हुने अनुमान गरे पनि हालसम्म १ करोड ५० लाखमात्र संकलन भएको उहाँले जानकारी दिनुभयो । पालिकाको राजस्व धेरै संकलन हुने भनेको स्रोत खोला भएको भन्दै अध्यक्ष पुडासैनीले ढुङ्गा, गिट्टी र बालुवामा ठेक्का नलाग्नाले राजस्व कम संकलन भएको बताउनुभयो । ३–४ पटकसम्म ठेक्का आह्वान गर्दा पनि आर्थिक मन्दी तथा विभिन्न कारणले ठेक्का नलागेको उहाँको भनाई छ ।
पालिकामा समितिमार्फत् हुने साना खालका योजना सम्पन्न भएका र ठूला खालका ठेक्का लाग्ने योजनाका कामहरु सम्पन्न हुन बाँकी रहेको छ । सबै विकासका कामहरु पूरा भएमा सबैको रकम भुक्तानी दिन समस्या हुने उहाँको भनाई छ । पालिकामा विकासतर्फ सडक निर्माण, खानेपानी, कृषि क्षेत्रमा ४० प्रतिशत सम्पन्न भइसकेको र ४० प्रतिशत सम्पन्न हुने अवस्थामा रहेको उहाँले जानकारी दिनुभयो । आगामी आर्थिक वर्ष २०८०–८१ को बजेट निर्माणको तयारी भइरहेको उहाँको भनाई छ ।
