हेटौंडाः हेटौंडा उपमहानगरपालिकाले कोरोना भाइरसविरुद्धको अभियानका लागि विपद् व्यवस्थापन कोषमा भएको रकम खर्चने भएको छ । उपमहानगरपालिकाले छुट्टै कोष नबनाई विपद् जोखिम कोषबाटै काम गर्ने भएको हो । यस्तै उपमहानगरपालिकाले सार्वजनिक रुपमा सहयोगको याचना नगर्ने र विपद् जोखिम न्यूनीकरण कोषबाट अपुग भए उपमहानगरपालिकाकै बजेटबाट आवश्यक खर्च गर्ने बताइएको छ ।
हेटौंडा उपमहानगरपालिकाको विपद् जोखिम न्यूनीकरण तथा व्यवस्थापन गर्न बनेको ऐन २०७५ अन्तर्गत गठन गरेको विपद् व्यवस्थापन कोषमा ७५ लाख रुपैयाँ बजेट रहेको हेटौंडा उपमहानगरपालिकाका सूचना अधिकृत भानुभक्त थपलियाले जानकारी दिनुभएको छ । चालु आर्थिक वर्षमा उपमहानगरपालिकाले कोषमा ७५ लाख रुपैयाँ बजेट विनियोजन गरेको थियो । चालु आर्थिक वर्षका लागि विपद् व्यवस्थापन कोषमा विनियोजन गरिएको बजेट अपुग भए उपमहानगरकै कोषबाट आवश्यक खर्च गरिने हेटौंडा उपमहानगरपालिकाका मेयर हरिबहादुर महतले जानकारी दिनुभयो । कोरोना विरुद्ध आवश्यक कार्य गर्न प्रदेश सरकारले दिने भनिएको १५ लाख रुपैयाँ पनि उपमहानगरपालिकाको विपद् व्यवस्थापन कोषमै राखेर आवश्यक कार्य गरिने मेयर महतले स्पष्ट पार्नुभयो । विपद्का बेला सबैक्षेत्र र व्यक्ति प्रभावित भइरहेको र उपमहानगरसँग बजेट हुँदाहुँदै सहयोगको याचना उपयुक्त नहुने भन्दै उपमहानगरपालिकाले आफ्नै कोषबाट विपद्को बेला काम गर्ने निर्णय भएको मेयर महतले बताउनुभयो ।
