हेटौंडाः कोरोना भाइरस संक्रमणका कारण चालु आर्थिक वर्षका लागि निर्धारण गरिएको शिक्षक क्षमता अभिवृद्वि तालिम हुनसकेको छैन । माघ मसान्तसम्म गर्नुपर्ने तालिम विद्यालय बन्द भएसँगै हुन नसकेको हेटौंडा उपमहानगरपालिकाको शिक्षा विकास महाशाखा प्रमुुख गंगाधर रिमालले बताउनुभयो ।
विद्यालय लेखा व्यवस्थापन तालिम, विषयगत तालिम र बालविकास सहयोगी कार्यकर्ता तालिम माघ महिनामा गर्ने निर्णय गरिएको रिमालले जानकारी दिनुभयो । उपमहानगरपालिकाको आन्तरिक स्रोतअन्तर्र्गत् विद्यालय लेखा व्यवस्थापन तालिमका लागि ३ लाख रुपैयाँ बजेट विनियोजन गरेको उपमहानगरका शिक्षा अधिकृत रामचन्द्र खड्काले जानकारी दिनुभयो । यसैगरी विषयगत तालिमका लागि ३ लाख रुपैयाँ र बालविकास सहयोगी तालिमका लागि ५ लाख रुपैयाँ बजेट विनियोजन गरिएको थियो ।
अहिले कोरोना महामारीका कारण हुन नसकेको तालिम चालु आर्थिक वर्ष (असार मसान्त) भित्र गरिने महाशाखा प्रमुख रिमालले बताउनुभयो । शैक्षिक विकास लागि शिक्षकलाई उपमहानगरले तालिम दिँदै आइरहेको छ ।
