हेटौंडाः मकवानपुरको राक्सिराङ गाउँपालिकामा अटो, बस, बोलेरो लगायत सवारी साधानले बढी भाडा लिएको गुनासो गाउँपालिकामा आएपछि गाउँपालिकाले चासो देखाएको छ । बिहीबार गाउँपालिमा सबै वडाका वडाअध्यक्ष, सबै पार्टीको पालिकास्तरिय प्रतिनिधि, उपभोक्ता, नागरिक समाजसहितको उपस्थितिमा बढी भाडा लिएको विषयमा छलफल भएको थियो । छलफलले बढी भाडा लिएको नियन्त्रण गर्न तथा आवश्यकता अनुसार सवारी भाडादर तोक्न गाउँपालिकाको उपाध्यक्षको संयोजकत्वमा कार्यदलनै गठन गरेको छ ।
कार्यदलमा गाउँपालिकाका सबै वडाका वडा अध्यक्ष, पालिका स्तरिय सबै पार्टी प्रमुख, अटो, बस व्यवसायी मध्येबाट ३ जना, उपभोक्ताबाट ३ जना सदस्य रहने गरी कार्यदल गठन भएको राक्सिराङ गाउँपालिकाका प्रमुख प्रशासकीय अधिकृत देवचन्द्र गत्तौलाले जानकारी दिनुभयो ।
उहाँका अनुसार वडामा रहेको कार्यदलले आआफ्नो भूगोल, दुरी, प्रचलित इन्धनको मुल्य लगायतको अध्ययन गरेर एक हप्ताभित्र कार्यदलमा भाडादर पेश गर्नेछ । कार्यदलमा सोही भाडादरबारे छलफल गरेर तोक्ने भएको हो । अहिले मनहरीदेखि चैनपुरसम्म अटोेले १५० रुपैयाँ भाडा लिदै आएको छ भने बसले राक्सिराङसम्म ५ सयसम्म भाँडा लिने गरेको पाइएको छ ।
