हेटौंडाः मकवानपुरमा निषेधाज्ञा अगामी जेठ १३ गते राति १२ बजेसम्मका लागि लम्बिएको छ । यसअघि जिल्लाका चारवटा स्थानीय तहमा लागू भएको निषेधाज्ञा अहिले सबै १० वटै स्थानीय तहमा लगाइएको छ ।
धेरै नेपालीहरु गरिबीको रेखामुनि रहेका कारण नयाँ प्रकारको कोरोना भइरस संक्रमण बढेसँगै भएको निषेधाज्ञाले धेरैलाई पिरोलेको छ । दैनिक ज्यालादारी गरेर परिवार पालिरहेका तथा हुँदाखाने वर्गका नेपालीलाई दैनिकी चलाउन समस्या भइरहेको छ ।
कोरोना भाइरस संक्रमित बढ्दै जाँदा उपचारका लागि अक्सिजन अभावको अवस्था सृजना भइरहेको छ । अझै संक्रमित बढेमा अस्पतालमा बेड नपाउनुका साथै अक्सिजन अभाव हुने अवस्था गाउँ शहर जताततै छ । निषेधाज्ञा बढ्दै जाँदा शहरमा मात्र नभई गाउँघरमा पनि मानिसलाई हातमुख जोड्न समस्या हुने निश्चित छ ।
पछिल्लो समय मकवानपुर जिल्लाको हेटौंडा उपमहानगरपालिका, थाहा नगरपालिका तथा मनहरी गाउँपालिकामा कोरोना संक्रमितको संख्या अन्य पालिकाको भन्दा धेरै छन् । मनहरी गाउँपालिकामा गत शनिबारसम्म एक सय ३१ जना संक्रमित भएका छन् । संक्रमितमध्ये तीन जनाले ज्यान गुमाएको मनहरी गाउँपालिकाका सिनियर अहेव ज्योतिराज लुईंटेलले जानकारी दिनुभयो ।
मनहरी गाउँपालिकाले कोभिड अस्पतालको व्यवस्थापन गरेर बिरामीलाई सेवा दिइरहेको छ । अस्पतालमा हाल ४ वटा अक्सिजन कन्सन्ट्रेटरसहित आवश्यक अक्सिजन सिलिण्डरको व्यवस्था गरिएको सिनियर अहेव लुईंटेलले बताउनुभयो । अस्पातलको क्षमताअनुसार बिरामी रहेको र आवश्यक अक्सिजन मौज्दात रहेकोले तत्काल अक्सिजन अभाव हुने सम्भावना नरहेको उहाँले बताउनुभयो ।
मनहरी गाउँपालिकाको मुख्य बजार क्षेत्रहरुमा मास्कको प्रयोग अनिवार्य गरिएको र निषेधाज्ञामा कडाई गरिएको छ । संक्रमण दर थप बढ्दै गयो भने उपचारमा अक्सिजनको अभाव हुने लुईंटेलले बताउनुभयो ।
अहिलेसम्म कोही पनि गाउँपालिकाको कार्यालयमा राहत चाहियो वा खाना पाइएन भनेर नआएको मनहरी गाउँपालिकाका अध्यक्ष एकराज उप्रेतीले बताउनुभयो । निषेधाज्ञा अझै थपिँदै गएमा भोकमरीको सम्भावना हुने र त्यस अवस्थामा राहतका लागि प्रदेश सरकार र संघीय सरकारसँग समन्वय गरिने अध्यक्ष उप्रेतीले बताउनुभयो ।
बढ्दो कोरोना भाइरस संक्रमणको जोखिम बढ्न नदिन राक्सिराङ गाउँपालिकाले पनि विभिन्न रणनीतिहरु बनाई कार्य गरिरहेको छ । गाउँपालिकामा विपन्न वर्ग, ज्याला मजदुरी र खेती किसान गरी खानेहरु लगभग ७० प्रतिशतभन्दा धेरै रहेका छन् । मानिसले काम गर्न नपाउँदा गाउँपालिकामा खाद्यान्नलगायतको अभाव देखिने सम्भावना रहेको गाउँपालिका अध्यक्ष राजकुमार मल्लले जानकारी दिनुभयो । हेटौंडा, चितवन, काठमाडौंलगायत अन्य ठाउँमा गई ज्यालादारी तथा मजदुरी गर्ने परिवारका सदस्य बढि भएकाले उनीहरु गाउँमा आउँदा खाद्यान्नको अभाव हुने उहाँले बताउनुभयो ।
अहिलेसम्म कोही पनि खाद्यान्न अभाव भयो भनेर नआएको भए पनि केही दिनमा समस्या देखापर्ने उहाँले बताउनुभयो । गाउँपालिकाले तत्काल राहत उपलब्ध गराउन नसकिने पनि अध्यक्ष मल्लले बताउनुभयो । भएका बजेटहरु खर्च गरिसकेको र एकदमै न्यून रकम बाँकी रहेकाले राहतको व्यवस्थापन गर्न नसकिने उहाँले बताउनुभयो । यसका लागि संघीय तथा प्रदेश सरकारको ध्यानाकर्षण गराउने अध्यक्ष मल्लले जानकारी दिनुभयो ।
