हेटौंडाः मकवानपुर उद्योग वाणिज्य संघको निर्वाचन २०७८ साल बैशाख १८ गते हुने भएको छ । संघको बिहीबार बसेको कार्यसमिति बैठकले नयाँ मिति तय गरेको हो । संघको ५४ औं वार्षिक साधारण सभाको कार्यक्रम भने बैशाख १५ गते हुने भएको छ ।
यसअघि २०७७ चैत्र २१ गते वार्षिक सभा र २३ गते निर्वाचन कार्यक्रम तय गरेको संघले २०७७ चैत्र ८ गते स्वास्थ्य मन्त्रालयबाट जारी प्रेस विज्ञप्ति र २०७७ चैत्र ९ गते जिल्ला प्रशासन कार्यालय मकवानपुरबाट जारी भेला, गोष्ठी, सभा, एवम् भीडभाड हुने कार्यहरु नगर्न सूचना गरेकाले स्थगित गरेको जनाएको थियो ।
जिल्ला प्रशासन कार्यालय मकवानपुरले कोभिड संक्रमणको जोखिमप्रति सतर्क रहेर स्वास्थ्य सुरक्षाका मापदण्डहरु अपनाएर सभा तथा निर्वाचन कार्यक्रम गर्न निर्देशन दिएपछि संघले साधारणसभा तथा निर्वाचनको मिति तय गरेको हो । तीन वर्षे कार्यकालका लागि नेतृत्व गर्न राजकुमार न्यौपाने, कृष्ण कुमार गुप्ता अग्रवाल र महेन्द्र राउतले अध्यक्षको उम्मेदवारी घोषणा गरेका छन् ।
