हेटौंडाः मकवानपुरको इन्द्रसरोवर गाउँपालिकाको आवधिक योजना तथा मध्यकालीन खर्च संरचना तर्जुमा सुरु भएको छ । इन्द्रसरोवर गाउँपालिकाको आयोजना तथा गभर्नेन्स एण्ड डिजाइन सोलुशन नेपालको सहजीकरणमा चैत्र १४ गते शनिबार नगरकोटमा ३ दिने कार्यशाला सुरु भएको हो ।
कार्यक्रमको उद्घाटनमा गाउँपालिकाका उपाध्यक्ष तथा सभाध्यक्ष उमा कुमारी लामाले गाउँपालिकाको भविष्यको खाका कोर्न सम्बन्धित सबै सरोकारवालाहरुले विशेष महत्व र प्राथमिकता दिई सफल बनाउन जोड दिनुपर्ने बताउनुभयो । कार्यक्रमको उद्घाटन सत्रमा स्वागत मन्तव्य व्यक्त गर्दै गाउँपालिकाका प्रमुख प्रशासकीय अधिकृत किरण निधि तिवारीले कार्यशाला निक्कै नै महत्वपूर्ण र राज्यले निर्देशन दिएको कार्य भएकोले चौतर्फी आलोचनाको बाबजुद पनि कार्यक्रमलाई प्राथमिकता दिइएको बताउनुभयो ।
गाउँपालिकाको दस्तावेज निर्माणका लागि गाउँपालिका भित्रका जनप्रतिनिधि, राजनीतिज्ञ दलका प्रतिनिधि, विद्यालयका प्रधानाध्यापक, होटल, मत्स्य र डुंगा व्यवसायी संघका प्रतिनिधि, गाउँपालिकाका विभिन्न शाखाका प्रमुखहरु, बाल क्लबका प्रतिनिधि, सञ्चारकर्मी, लगायत गाउँपालिकाको विकाससँग सम्बन्धित सरोकारवाला नागरिक तथा कर्मचारीहरुको सहभागितामा विशेष महत्वका साथ कार्यशाला निर्माण सुरु भएको हो ।
कार्यशालाबाट गाउँपालिकाको पाश्र्वचित्र, आयव्यय, पालिकाको बस्तुगत विश्लेषण, दीर्घकालीन सोच निर्धारण, समष्टिगत लक्ष्य, विषयक्षेत्रगत उद्देश्य तथा रणनीति, उप–विषयक्षेत्रगत उद्देश्य, रणनीति, मुख्य कार्यक्रम, अपेक्षित लगानी अनुमान र पालिकास्तरीय गौरवका आयोजना निर्धारण लगायतका नजिता प्राप्ति हुने प्रशिक्षक बिके महर्जनले जानकारी दिनुभयो । आवधिक योजना निर्माणका लागि फागुन महिनाभर विभिन्न चरणमा तयारीका कार्यक्रम तथा गतिविधि सञ्चालन गरिएको थियो । कार्यशाला १७ गते विहानसम्म सञ्चालन हुने अयोजकले जनाएको छ ।
