हेटौंडाः हेटौंडा–१० स्थित वनविज्ञान क्याम्पस परिसरमा वन्यजन्तुको ज्यान जोगाउन सरोकारवाला तथा स्थानीय प्रशासनको ध्यान नपुगेको भन्दै वन विज्ञान विषय अध्ययनरत विद्यार्थीले पूर्वपश्चिम राजमार्ग अवरुद्ध गरेका छन् । एक साताको अवधिमा दुई वटा चित्तलको मृत्यु भएपछि विद्यार्थीले आइतबार बिहान वनविज्ञान क्याम्पस अगाडि पूर्वपश्चिम राजमार्ग करिब आधा घण्टा अवरुद्ध गरेका हुन् । मृत भेटिएको चित्तल नै सडकमा राखेर विद्यार्थीले राजमार्ग अवरुद्ध गरेका थिए ।
आइतबार बिहान वनविज्ञान क्याम्पसको शैक्षिक भवन भन्दा अगाडिपट्टी चित्तल मृत भेटिएको हो । यसअघि गत बिहीबार दिउँसो पनि कुकुरको आक्रमणमा परी एउटा चित्तलको मृत्यु भएको थियो । एक साताको बीचमा दुईवटा चित्तलको मृत्यु भएपछि विद्यार्थीहरु चिन्तित हुँदै स्थानीय प्रशासन र सरोकारवालाको ध्यानाकर्षण गराउन राजमार्ग अवरुद्ध गरेको विद्यार्थीको भनाइ छ । आइतबार बिहान मृत भेटिएको चित्तलको शरीरमा कुनै चोट छैन । मृत भेटिएको चित्तलको पोष्टमार्टमपछि मृत्युको कारण खुल्ने डिभिजन वन कार्यालय हेटौंडाका अधिकारीको भनाइ छ ।
स्थानीयका अनुसार चित्तलको आकर्षक बासस्थानको रुपमा रहेको वन विज्ञान क्याम्पस परिसरमा पूर्वपश्चिम राजमार्गतर्फ पक्की पर्खाल नहुनु, छाडा छाडिने कुकुरको संख्या उच्च रहनु र वन विज्ञान क्याम्पस परिसर सधै खुला रहनुले चित्तलको मृत्यु बढेको हो ।
