हेटौंडाः बागमती प्रदेश सरकारले प्रदेशभित्रका नागरिकहरुलाई क्यान्सर रोगको उपचार गर्न थप ५० हजार रुपैयाँको सहुलियत उपचार सेवा दिएको छ । प्रदेश सरकारले १८ वटा निजी तथा सरकारी अस्पतालहरुबाट सो सेवा दिन सुरु गरेको हो ।
चालू आर्थिक वर्ष २०७७÷७८ मा ७ करोड ५० लाख बजेट विनियोजन गरेको प्रदेश सरकारले गत फागुन महिनाबाट सेवा दिन सुरुवात गरिएको प्रदेशको सामाजिक विकास मन्त्रालयका प्रवक्ता डा. पुरुषोत्तराज सेढाईंले बताउनुभयो । संघीय सरकारले यसअघि क्यान्सर रोगको उपचार गर्न विपन्न नागरिकहरुलाई एक लाखसम्मको सहुलियत उपचार सेवा दिँदै आएको थियो ।
बागमती प्रदेश सरकारले संघीय सरकारले प्रदान गर्दै आएको १ लाखको सहुलियत उपचार सेवामा ५० हजार रुपैयाँ थप गरेको हो । बागमती प्रदेशका क्यान्सर रोग लागेका नागरिकले अब १ लाख ५० हजार रुपैयाँसम्मको सहुलियत उपचार सेवा पाउने भएका छन् ।
सामाजिक विकास मन्त्रलायले क्यान्सर रोगको उपाचार गर्न सूचीकृत गरेको १८ अस्पतालमध्ये ३ वटा अस्पतालहरुसँग सम्झौता हुन बाँकी भएको जनाएको छ । ललितपुरको बीएण्डबी अस्पताल, भरतपुरको नेशनल सिटी हस्पिटल र भरतपुर सेन्ट्रल हस्पिटलसँगको सम्झौता प्रक्रियामा रहेको छ ।
संघीय सरकारले दिँदै आएको सहुलियत उपचार सेवामा प्रदेश सरकारले दिएको ५० हजार रुपैयाँ थप हुने मन्त्रालयका प्रवक्ता सेढाईंले जानकारी दिनुभयो । बागमती प्रदेशको १३ जिल्लाका नागरिकले जुनसुकै क्यान्सर रोगको उपचार गर्न सो रकम बराबरको सहुलियत उपचार सेवा सूचीकृत १८ अस्पतालबाट लिन सक्नेछन् ।
