हेटौंडाः हेटौंडा उपमहानगरपालिकाका विभिन्न सामुदायिक विद्यालयको व्यवस्थापन समिति गठनमा ढिलाई भइरहेको छ । विद्यालय व्यवस्थापन समितिको अध्यक्ष चयनमा सहमति जुट्न नसक्दा व्यवस्थापन समिति गठनमा ढिलाई भइरहेको हो । हेटौंडा उपमहानगरपालिकाका मेयर हरिबहादुर महतले विद्यालय व्यवस्थापन समिति गठनमा भइरहेको ढिलाईप्रति उपमहानगरको शिक्षा विकास महाशाखाको ध्यानाकर्षण गराउनुभएको छ । नगरक्षेत्रका विद्यालयमा व्यवस्थापन समिति गठन गर्न भइरहेको ढिलाईप्रति ध्यानाकर्षण भएको जानकारी गराउनुहुहुँदै महाशाखा प्रमुख गंगाधर रिमाललाई मिति नै तोकेर व्यवस्थापन समिति गठन गर्न प्रधानाध्यापकलाई पत्राचार गर्न निर्देशन दिनुभएको हो । तोकिएको मितिभित्र समिति गठन नभए उपमहानगरपालिकाले नै अध्यक्षसहित समिति गठन गरिदिने जानकारी गराउन मेयर महतले महाशाखा प्रमुखलाई स्पष्ट निर्देशन दिनुभएको छ ।
तीन वर्षको कार्यकाल रहने विद्यालय व्यवस्थापन समितिका पदाधिकारी चयनका लागि सहमतिमा निर्णय गर्नुपर्ने व्यवस्थाका कारण सहजै व्यवस्थापन समिति चयन हुन नसकेको हो । कतिपय विद्यालयले अभिभावक भेला गराएर व्यवस्थापन समिति चयन प्रक्रिया सुरु गरेको भए पनि समितिले पूर्णता पाउन सकेको छैन । हेटौंडा उपमहानगरपालिका क्षेत्रमा रहेका ७७ वटा सामुदायिक विद्यालयमध्ये ३० वटा भन्दा बढी संख्यामा विद्यालयमा व्यवस्थापन समिति चयन भएको हेटौंडा उपमहानगरपालिकाको शिक्षा विकास महाशाखाले जनाएको छ । महाशाखाले हेटौंडा उपमहानगरपालिकाको शिक्षा ऐनअनुसार विद्यालय व्यवस्थापन समिति गठन गराइरहेको भए पनि नगर क्षेत्रका ठूला तथा पुराना सामुदायिक विद्यालयमा लामो समयदेखि व्यवस्थापन समितिले पूर्णता पाउन सकेको छैन ।
हेटौंडा उपमहानगरपालिका–१ स्थित अमर मावि, हेटौंडा–२ स्थित सिद्धार्थ मावि, हेटौंडा–४ स्थित भूटनदेवी मावि, हेटौंडा–१९, बस्तीपुरस्थित निर्मल माविमा अभिभावक भेला सम्पन्न भए पनि व्यवस्थापन समितिले पूर्णता पाउन सकेको छैन । हेटौंडा–२ स्थित सिद्धार्थ माविमा दुईजना महिला सदस्य सिटमा तीन जनाको उम्मेदवारी परेको र थप दुईजना सदस्यका लागि सहमति हुन नसकेको प्रधानाध्यापक मोहनप्रसाद शर्माले जानकारी दिनुभएको छ । गत पुस २४ गते विद्यालयमा अभिभावक भेला भए पनि विद्यालय व्यवस्थापन समिति गठनमा भने सहमति हुन नसकेको उहाँको भनाइ छ ।
यस्तै हेटौंडा–४ स्थित भुटनदेवी माविमा पनि गत पुस २९ गते अभिभावक भेला भएर माघ महिनाको दोस्रो साता सदस्यहरु चयन गरिए पनि अध्यक्ष चयनमा भने सकस भइरहेको छ । अध्यक्ष चयनमा भइरहेको सकसले विद्यालयले शिक्षक नियुक्त गर्नेदेखि विद्यालयको अनुदानका कार्यक्रम सञ्चालनमा समस्या भइरहेको बताइएको छ । यता गत माघ ९ गते अभिभावक भेला गरेको निर्मल माविमा पनि अझै व्यवस्थापन समिति चयन हुन सकेको छैन । पुरुष २ जना चयन भए पनि २ जना महिला सदस्य भने चयन हुन नसकेको प्रधानाध्यापक प्रवोध विडारीले जानकारी दिनुभएको छ । दुईजना महिला सिटमा ४ जना आकांक्षी देखिएपछि समस्या भएको उहाँको भनाइ छ ।
विद्यालय व्यवस्थापन समिति गठन हुन नसक्दा शिक्षक नियुक्तिदेखि विद्यालयमा प्राप्त हुने अनुदान रकम एवम् कार्यक्रम कार्यान्वयनमा समस्या हुने गरेको छ । उपमहानगरपालिकाको शिक्षा ऐनमा ९ जनाको विद्यालय व्यवस्थापन समिति गठन गरिने व्यवस्था छ । विद्यालय व्यवस्थापन समितिमा अभिभावकमध्येबाट २ जना महिलासहित ४ जना चयन गर्नुपर्ने व्यवस्था गरिएको छ । विद्यालय रहेको वडाको वडा अध्यक्ष वा सदस्यमध्येबाट एक जना, विद्यालयको शिक्षक प्रतिनिधि एक जना र प्रधानाध्यापक एक जना गरी थप ३ जनासहित अभिभावकबाट चयन भएका ४ जनाको बैठकले स्थानीय शिक्षासेवी, विद्यालयको चन्दादाता तथा समाजसेवीमध्ये एक जना महिलासहित २ जनालाई व्यवस्थापन समितिमा मनोनित गर्ने व्यवस्था उपमहानगरको शिक्षा ऐनमा छ । ९ जनाको व्यवस्थापन समितिको बैठकले अभिभावकबाट चयन भएका वा मनोनित गरिएकामध्येबाट समितिको अध्यक्ष चयन गर्ने र विद्यालयका प्रधानाध्यापक सदस्यसचिव रहने व्यवस्था छ ।
