हेटौंडाः सहीद स्मारक सी डिभिजन लिगको छनौट प्रतियोगिता अन्तर्गत जारी खेलमा मकवानपुरको एफसी विजय युथ छनौट प्रतियोगिताबाट बाहिरिएको छ । बुधबार ललितपुरस्थित एन्फा कम्प्लेक्समा भएको खेलमा सिन्धुपाल्चोक एफसीसँग २–२ गोलको बराबरी खेलेसँगै विजय युथ प्रतियोगिताबाट बाहिरिएको हो ।
बुधबारको खेलमा विजय युथलाई जित्नैपर्ने दबाव थियो । तर, खेल बराबरीमा सकिएपछि विजय युथ प्रतियोगिताबाट बाहिरिएको हो । यसअघिको पहिलो खेलमा विजय युथ ललितपुरको साउर्थन एफसीसँग १–० गोलअन्तरले पराजित भएको थियो । विजय युथले लगातार तेस्रो पटक ‘सी’ डिभिजन छनौटका लागि प्रतिस्पर्धा गरे पनि असफल भएको हो ।
