हेटौंडाः मदन भण्डारी स्वास्थ्य विज्ञान प्रतिष्ठान बागमती प्रदेशको चालू वर्षबाट शैक्षिक कार्यक्रम सुरु भएको छ । सोमबार जननेता मदन भण्डारीको ७० औं जन्मजयन्तीको अवसरमा प्रधानमन्त्री केपि शर्मा ओलीले भर्चुअल माध्यमबाट प्रतिष्ठानको शैक्षिक कार्यक्रम सुरु भएको घोषणा गर्नुभएको हो ।
मदन भण्डारीको ७० जन्मजयन्तीकै अवसरमा प्रतिष्ठानले शैक्षिक कार्यक्रम सुरुवात गरेकामा खुशी व्यक्त गर्दै प्रम ओलीले जननेता भण्डारीलाई स्मरण गर्नुभएको छ । जननेता मदन भण्डारीबाट हामीले थुप्रै कुरा सिक्नुपर्ने भन्दै देशभक्ति, लोकतान्त्रीक अभ्यास र आचरण, सुशासन, शान्ति र विकासको अवधारणाबाट देशलाई समृद्धि बनाउन सकिने बताउनुभयो । यही अवधारणअनुसार अघि बढ्दै समृद्ध नेपाल र सुखि नेपाली बनाउनमा जो जहाँ जुन विधा र विषयमा भएपनि त्यहि केन्द्रित भएर राष्ट्र निर्माणमा लाग्नुपर्ने उहाँले बताउनुभयो ।
प्रधानमन्त्री ओलीले प्रतिष्ठानको शैक्षिक सत्र शुभारम्भ गर्दै आजको शिक्षा जीवनपयोगी, प्राविधिक शिक्षा र गुणस्तरीय शिक्षाको आवश्यक भएको बताउनुभयो । सरकारले शिक्षाको चौतर्फी क्षेत्रमा ध्यान दिएको बताउँदै प्रम ओलीले लर्निङ बाइ डुइङ जस्ता कामबाट व्यवहार, शिक्षा र अनुभव सिक्दै जानुपर्ने बताउनुभयो । हरेक तहको शिक्षामा प्रारम्भिक देखिनै गुणस्तरी शिक्षा विकास गरिनुपर्ने ओलीले धारणा व्यक्त गर्नुभयो ।
मदन भण्डारी स्वास्थ्य विज्ञान प्रतिष्ठानले छोटो अवधिमा आफ्नो क्रियाशिलता र सफलता प्रस्तुत गरेको भन्दै दक्ष जनशक्ति उत्पादन र जनतालाई भरपर्दो सेवा सर्व सुलभ ढंगले पु¥याउनुपर्ने ओलीले बताउनुभयो । प्रतिष्ठानले उत्पादन गरेका विद्यार्थी हरेक तहमा प्रतिस्पर्धी हुन सक्नेगरी अघि बढ्न उहाँले आग्रह गर्नुभएको छ ।
प्रतिष्ठानलाई चालू वर्षमा तीन वटा स्नातक तहको अध्यापन गराउन राष्ट्रिय चिकित्सा शिक्षा आयोगले ८० सिट निर्धारण गरेको छ । पहिलो वर्षमै प्रतिष्ठानले ८० सिट पाएको हो । पहिलो वर्षमा प्रतिष्ठानले जनस्वास्थ्यमा २०, फार्मेशीमा ३०, मेडिकल ल्याब टेक्नोलोजीमा ३० सिट पाएको प्रतिष्ठानका रजिष्ट्रार राजेश प्रसाईले बताउनुभयो ।
प्रतिष्ठानले शैक्षिक, अनुसन्धान र उपचार सेवा गरी तिन वटा सेक्टरमा काम गर्दै आएको छ । कार्यक्रममा मदन भण्डारी स्वास्थ्य विज्ञान प्रतिष्ठान बागमती प्रदेशको एवं मुख्यमन्त्री डोरमणि पौडेल, प्रदेशका मन्त्रीहरु सरस्वती बस्नेत, कैलाश ढुंगेल, रामेश्वर फुयाँल, दावा दोर्जे लामा लगायतका उपस्थिति रहेको थियो ।
