हेटौंडाः बारा जिल्लाको सिमरामा जारी भेट्रान्स फुटबल प्रतियोगिताअन्तर्गत आइतबार भएको खेलमा हेटौंडाको हेटौंडा फुटसल भेट्रान्स विजयी भएको छ । हेटौंडा फुटसल भेट्रान्सले भेट्रान सिटी वीरगन्जलाई २–१ गोलअन्तरले पराजित गरेको छ ।
५० मिनेटको खेलमा हेटौंडाका लागि सञ्जीव राजबाहक र रविन श्रेष्ठले गोल गरे । यसअघि शनिबार प्रतियोगिताको उद्घाटन खेलमा हेटौंडाकै मकवानपुर भेट्रान्सले पनि विजयी सुरुवात गरेको थियो । मकवानपुर भेट्रान्सले मंगलबार वीरगन्ज युथ एकेडेमी भेट्रान्ससँग खेल्नेछ । यस्तै हेटौंडा फुटसल भेट्रान्सले सोमबार जैतापुर भेट्रान्स र विकासशील भेट्रान्सबीचको खेलको विजयी टिमसँग खेल्नेछ ।
विभिन्न जिल्लाका १२ वटा टिम सहभागी प्रतियोगितामा हेटौंडाबाट मकवानपुर भेट्रान्स क्लब र हेटौंडा फुटसल भेट्रान्स गरी २ वटा टिम सहभागी छ । प्रतियोगितामा प्रथम हुने टिमले नगद ३० हजारसहित शिल्ड, मेडल र प्रमाणपत्र प्राप्त गर्नेछ भने दोस्रो हुने टिमले नगद २० हजारसहित शिल्ड, मेडल र प्रमाणपत्र प्राप्त गर्ने आयोजकले बताएको छ ।
