हेटौंडाः राष्ट्रिय मानव अधिकार आयोगको बागमती प्रदेश कार्यालयले वार्षिक गतिविधि पुस्तक २०७७ को विमोचन गरिएको छ । बिहीबार बागमती प्रदेशका सभामुख सानुकुमार श्रेष्ठले वार्षिक गतिविधि विमोचन गर्नुभएको हो । जुम मार्फत आयोजना गरिएको कार्यक्रममा प्रदेश भित्र आर्थिक वर्ष २०७६-७७ मा कुल ६८ वटा मानवअधिकार उल्लङ्घनका उजुरीहरु परेको र बढी उजुरीहरु काठमाडौं जिल्लाबाट प्राप्त भएको विषयमा जानकारी गराइएको थियो ।
कार्यक्रममा सभामुख सानुकुमार श्रेष्ठले नेपालको संविधानले मानव अधिकारका विषयहरुमा सम्बोधन गरे पनि सरकारले कार्यान्वयनको पाटो बलियो बनाउन नसकेको बताउनुभएको छ । जनताको चेतनाको स्तर विकास गर्न सरोकारवाला निकायले ध्यान पुर्याउन सके मानवअधिकार उल्लङ्घनका घटनामा उल्लेख्यनीय कमी आउने उहाँले बताउनुभयो । बागमती प्रदेशमा मानवअधिकार उल्लङ्घनका घटनाहरुमा कमि आएको बताइएको छ । राष्ट्रिय मानव अधिकार आयोगका सचिव वेदप्रसाद भट्टराईको अध्यक्षतामा कार्यक्रम भएको हो ।
