हेटौंडाः लकडाउनयता नियमित सेवा, सुविधा नपाएको भन्दै आन्दोलित निजी विद्यालयका शिक्षकले शनिबार निजी तथा आवासीय विद्यालय अर्गनाइजेशन (प्याव्सन) मकवानपुरको कार्यालयमा तालाबन्दी गर्ने भएको छ ।
केहीदिन अघि प्याव्सन मकवानपुर र हेटौंडा उपमहानगर समितिले संयुक्त रुपमा विज्ञप्ति जारी गर्दै भदौ महिनादेखि शिक्षक, कर्मचारीलाई तलब, सुविधा नदिने भन्दै विज्ञप्ति निकालेपछि उक्त विज्ञप्ति फिर्ता लिन भन्दै संस्थागत विद्यालय शिक्षक यूनियन (इस्टु) मकवानपुर र हेटौंडा उपमहानगर समितिले ३ दिने अल्टिमेटम दिएको थियो । अल्टिमेटम दिएको अवधिमा प्याव्सनले कुनै प्रतिक्रिया नजनाएसँगै बुधबार साँझ इस्टुले विज्ञप्ति जारी गरेर आन्दोलनको घोषणा गरेको हो । इस्टुले प्याव्सनको कार्यालयमा तालाबन्दी गर्नुका साथै भदौ २१ गतेदेखि शिक्षक, कर्मचारीको तलब सुविधा उपलब्ध नगराउने विद्यालयलाई ३ दिनको समय नाम सार्वजनिक गर्ने जनाएको छ ।
