हेटौंडाः बागमती प्रदेशको राजधानी हेटौंडाका २३ सहित मकवानपुर जिल्लाका २६ जनामा आज कोरोना सङ्क्रमण पुष्टि भएको छ । हेटौंडास्थित किटजन्य रोग अनुसन्धान तथा तालिम केन्द्रमा स्थापना गरिएको प्रादेशिक प्रयोगशालामा गरिएको परीक्षणमा आज हेटौंडा उपमहानगरपालिकाका स्थायीबासी १८, हेटौंडास्थित विभिन्न सरकारी कार्यालयमा कार्यरत कर्मचारी ५ जना र मकवानपुर जिल्लाका विभिन्न पालिकाका ३ सहित कुल २६ जनामा कोरोना सङ्क्रमण पुष्टि भएको हो ।
साउन २९ र ३० गते सङ्कलन गरिएको स्वाबको नमूना परीक्षण गर्दा हेटौंडा उपमहानगरपालिका वडा नम्बर ४ का ५ जना, वडा नम्बर ५ का ३ जना, वडा नम्बर ६ का १ जना, वडा नम्बर २ का १ जना, वडा नम्बर १ का १ जना, वडा नम्बर ८ का १ जना, वडा नम्बर १० का २ जना, वडा नम्बर ११ का २ जना र वडा नम्बर १२ का २ जना रहेका छन् । त्यस्तै मकवानपुरगढी गाउँपालिकाका २ जना र बागमती गाउँपालिकाका १ जना रहेका छन् । उनीहरु मध्ये हेटौंडा १ का एकजना स्वास्थ्यकर्मी रहेको पाइएको छ ।
हेटौंडाका विभिन्न कार्यालयमा कार्यरत कर्मचारीहरुमध्ये दैलेख, काठमाडौं, पाल्पा, भक्तपुर र पर्सा जिल्लाका १/१ जनामा सङ्क्रमण पुष्टि भएको हेटौंडास्थित आइसोलेसन वार्डका इञ्चार्ज भोला चौलागाईले जानकारी दिनुभयो । यसअघि हिजो सोमबार पनि बागमती प्रदेशकी उपसभामुख राधिका तामाङसहित १६ जनामा कोरोना भाइरस सङ्क्रमण पुष्टि भएको थियो । हिजो पहिचान भएका सङ्क्रमित मध्ये ८ जना प्रहरी थिए ।
