हेटौँडा ः नेकपा एमालेका मुख्य सचेतक महेश कुमार बर्तौलाले वनका सचिवहरुले मयुरधाप औद्योगिक क्षेत्रको योजना तुहाउन खोजेको आरोप लगाउनुभएको छ । उहाँले मध्यवर्ती क्षेत्रको नाममा वनका सचिवले औद्योगिक क्षेत्र निर्माणको योजना तुहाउने काम गरिरहेको बताउनुभयो ।
हेटौंडामा शनिबार पत्रकारहरुसँगको भेटघाटमा मुख्य सचेतक बर्तौलाले देशको अर्थतन्त्र र नागरिकको रोजगारीसँग जोडिएको गौरवको आयोजना मयुरधापको औद्योगिक क्षेत्रलाई वन र निकुञ्जको विभिन्न प्रावधान लगाएर रोक्न खोजेको बताउनुभयो । क्याविनेटबाट पारित गरी सबै प्रक्रिया पूरा गरी कार्यान्वयनको चरणमा रहेको उक्त योजनाको औचित्य र आवश्यकताको विषयमा प्रश्न गर्दै वनको सचिवस्तरका कर्मचारीले रोक्ने काम गरेको उहाँको भनाई छ ।
‘गौरवको आयोजना संचालनमा निकुञ्ज र वनका कर्मचारीको दादागिरी देखिएको छ । मयुरधाप औद्योगिक क्षेत्रको योजना तुहाउने रणनीति अनुसार वनका सचिवले सूचना जारी गरिएको छ’, उहाँले भन्नुभयो, ‘२०७२ सालमा घोषणा भएर विभिन्न प्रक्रियासहित जग्गा भोगाधिकार समेत पाएर अघि बढेको सो आयोजनाको औचित्य र आवश्यकता बारे प्रश्न गर्दै वन र निकुञ्जको कर्मचारी पत्र जारी गरिएको छ ।’ औद्योगिक क्षेत्रका पुन सम्भाव्यता अध्ययन गर्नुपर्ने भन्दै गत पुस ९ मा सचिवस्तरको निर्णयसहित सार्वजनिक सूचना जारी हुनुले देशको सिस्टममा व्यूरोक्रेसीको दवदवालाई स्पष्ट पारेको उहाँले बताउनुभयो । मध्यवर्तीको नाममा लगातारको असहयोग सह्य नहुने उहाँले बताउनुभयो ।
मध्यवर्ती क्षेत्रमा परेको भन्दै मयुरधाप औद्योगिक क्षेत्र संचालन प्रक्रिया अगाडि बढाउन अवरोध हुने गरी वन मन्त्रालयबाट पत्र प्रेषित हुनु दुःखद् रहेको उहाँको भनाई छ । मयुरधाप औद्योगिक क्षेत्र संचालनमा ल्याउने र नयाँ उद्योग कलकारखाना स्थापना गरी रोजगारीका अवसरहरु सिर्जनाको वातावरण बनाउन सक्रिय हुनुपर्ने उहाँले बताउनुभयो ।
राजनीतिक नेतृत्व नीतिगत निर्णय विपरित कर्मचारीहरुबाट औद्योगिक क्षेत्रको विषयमा असहयोग हुनु उपयुक्त नरहेको उहाँले स्पष्ट पार्नुभयो । सो विषयमा जनस्तरबाट समेत बलियो खवरदारी अपरिहार्य रहेको मुख्य सचेतक बर्तौलाले बताउनुभयो । मयुरधापमा औद्योगिक क्षेत्र निर्माण गरेर नागरिकको आयस्तर सुधार गर्न युवाहरुलाई रोजगारी अवसर दिनु पर्ने उहाँको भनाई छ । मयुरधाप औद्योगिक क्षेत्र संचालनले रोजगारी सृजना मात्र नभई राज्यलाई अर्बौं रुपैयाँ राजस्व संकलनको अवस्था निर्माण हुने उहाँले बताउनुभयो ।
