हेटौँडा ः हेटौँडा उपमहानगरपालिकाले गत आर्थिक वर्षको समीक्षा, चालु आर्थिक वर्षको हालसम्मको समीक्षा गर्दै आगामी आर्थिक वर्षको कार्यादेशसम्बन्धमा जनप्रतिनिधिहरुसँग छलफल कार्यक्रमको आयोजना गरेको छ । शनिबार साँझ अनौपचारिक छलफल गरेर आइतबार बिहान छलफल गरिएको हेटौँडा उपमहानगरपालिकाका अधिकारीले जानकारी दिएका छन् ।
शुक्रबार नगर सभा सदस्य समेतलाई सहभागी हुन आव्हान गरेर शनिबार साँझ र आइतबार बिहान छलफलको आयोजना गरेको हो । छलफलबाट १० बुँदामा निश्कर्ष निकालिएको हेटौँडा उपमहानगरपालिकाका अधिकृत भीमप्रसाद तिमल्सिनाले जानकारी दिनुभयो । छलफलमा प्रदेश सरकारसँग लागत सहभागितामा निर्माण गरिएको हेटौँडा–११, थानाभर्याङस्थित निर्माणाधिन फलफूल तथा तरकारीको थोक बजारमा प्रदेश सरकारको मन्त्रालय स्थापना गरिएको प्रति ध्यानाकर्षण गराइएको छ । कृषकका उपजको बजारीकरणका लागि निर्माण गरिएको संरचनामा मन्त्रालय स्थापना गर्नु उपयुक्त नभएको उल्लेख गर्दै निर्माण कार्य पूरा गरेर उपमहानगरपालिकामार्फत थोक बजार सञ्चालन गर्नुपर्ने निश्कर्ष निकालिएको छ ।
छलफलमा पूर्व–पश्चिम राजमार्गअन्तर्गत हेटौँडा बजार खण्डको सडक विस्तार, एक सय भन्दा कम संख्यामा विद्यार्थी भएका विद्यालयलाई नजिकैको विद्यालय गाभ्ने र गाभिने विद्यालयका विद्यार्थीलाई यातायातको सुविधासहित नजिकको विद्यालयमा समायोजन गर्ने, भुटनदेवी माध्यमिक विद्यालय र आधुनिक राष्ट्रिय माध्यमिक विद्यालयलाई गाभेर ठूलो विद्यालय बनाउने, अति विपन्न थामी र चेपाङ समुदायका परिवारको निशूल्क स्वास्थ्य वीमा गरिदिने निर्णय भएको तिमल्सिनाले बताउनुभयो ।
उपमहानगरपालिकाको हालसम्मको उपलब्धीका विषयमा प्रमुख प्रशासकीय अधिकृत सूर्यप्रसाद गौतमले प्रस्तुती राख्नुभएको थियो । छलफलमा प्रदेश सरकारका योजना एकद्वार प्रणालीबाट कार्यान्वयन हुन नसक्दा समस्या भएको जनप्रतिनिधिको भनाइ रहेको थियो । छलफलमा गुणस्तरीय पूर्वाधार निर्माणको विषयले पनि प्रवेश पाएको र हेटौँडा उपमहानगरपालिकाको प्रमुख क्षेत्रको विद्युतीय लाइनलाई भूमिगत गर्न आवश्यक भएकोप्रति जनप्रतिनिधि सुझाव दिएको बताइएको छ ।
नगर उपप्रमुख राजेश बानियाँले जनप्रतिनिधिसँगको छलफलबाट १० बुँदे निर्णय भएको र उक्त निर्णय प्रवक्तामार्फत सार्वजनिक हुने जानकारी दिनुभयो । छलफलमा महिलामुखी सहर निर्माण, राजमार्ग २५ मिटर विस्तार गर्ने विषयमा छलफल भएको उपप्रमुख बानियाँले बताउनुभयो । छलफलको विषयमा जानकारी लिन नगरप्रमुख मीना कुमारी लामासँग सम्पर्क गर्दा उहाँको मोवाइल उठेन । उपमहानगरपालिकाको वार्षिक समीक्षा र आगामी कार्यदिशाको विषयमा जनप्रतिनिधिसँगको छलफल सौराहामा आयोजना गरिएको विषयमा भने चौतर्फी आलोचना भइरहेको छ ।
