हेटौँडाः गत बिहिबारदेखि शनिबारसम्मको अविरल वर्षासँगै आएको बाढी, पहिरो र डुवानमा परेर बागमती प्रदेशमा ४९ जनाको मृत्यु भएको छ । काठमाडौं उपत्यका बाहेकका जिल्लामा बाढी पहिरो र डुवानमा परेर ४९ को मृत्यु हुँदा ४० जना घाइते भएका छन् भने ३५ जना हराइरहेका छन् ।
बागमती प्रदेश प्रहरी कार्यालय हेटौंडाको तथ्यांक अनुसार असोज ११ र १२ गतेको वर्षाका कारण आएको बाढी र पहिरोमा परेर धादिङ र काभ्रेमा सबैभन्दा बढी मानवीय क्षति भएको छ । बाढी पहिरोमा परेर धादिङमा १६ र काभ्रेमा १२ जनाको मृत्यु भएको प्रदेश प्रहरी कार्यालय हेटौंडाले जनाएको छ । त्यस्तै बाढी पहिरोका कारण मकवानपुरमा ७, सिन्धुपाल्चोकमा ६, दोलखामा ३, सिन्धुलीमा २ जना, रामेछाप, चितवन र नुवाकोटमा १÷१ जनाको मृत्यु भएको छ । रसुवामा मानवीय क्षति भएको छैन ।
बाढी पहिरोमा परेर सिन्धुपाल्चोकमा १६ जना घाइते हुँदा ६ जनाको अवस्था अज्ञात रहेको छ भने दोलखामा १ जना घाइते भएका छन् भने ४ जना बेपत्ता भएका छन् । काभ्रेमा घाइतेको संख्या १५ रहेको छ भने २३ जना बेपत्ता, नुवाकोटमा १ जना घाइते, धादिङमा घाइते ४ र २ जना वेपत्ता, मकवानपुरमा ३ जना घाइते भएका छन् ।
बाढी पहिरोको जोखिममा रहेका प्रदेशका ३२ घरका २४१ जनालाई सुरक्षित स्थानान्तरण गरिएको छ । प्रहरीका अनुसार चितवनमा ३ घरका १००, रसुवाका ४ घरका १९ जना, सिन्धुपाल्चोकका ६ घरका ३० जना, दोलखामा एक घरका ७ जना, रामेछापमा ३ घरका १० जना र सिन्धुलीमा १५ घरका ७५ जनालाई सुरक्षित स्थानान्तरण गरिएको छ ।
बाढी पहिरोका कारण मकवानपुरमा ३६ घर पूर्णरुपमा क्षति भएको छ भने चितवनमा २, नुवाकोटमा ४, रसुवामा ५, काभ्रेमा २३, सिन्धुपाल्चोकमा ५, दोलखामा २, रामेछापमा २०, सिन्धुलीमा एक गरी ९८ घर पूर्णरुपमा क्षति भएको छ । नुवाकोटमा १ र सिन्धुलीमा २ घरमा बाढी पहिरोले आंशिक क्षति पुगेको छ । बाढीका कारण मकवानपुरमा एउटा पुल बगाएको छ भने सिनधुपाल्चोकमा २ वटा सडक, पुल, रामेछापमा ३ वटा सडक तथा पुल बगाएको छ भने मकवानपुरमा ५, धादिङमा ४, नुवाकोटमा १०, सिन्धुपाल्चोकमा ५ गरी २४ पशुचौपायाको मृत्यु भएको छ ।
४,११९ प्रहरी परिचालन
प्रदेशमा बाढी, पहिरो तथा डुवानका घटना नियन्त्रण तथा उद्दार कार्यमा ४ हजार १ सय १९ जना प्रहरी परिचालन गरिएको छ । प्रदेश प्रहरी कार्यालयका अनुसार बाढी, पहिरो तथा डुवानका घटनामा खोजी उद्दार तथा सुरक्षाका लागि मकवानपुरमा ५ सय ६९, चितवनमा ७ सय ५९ जना, धादिङमा ४ सय ४ जना प्रहरी परिचालन गरिएको छ । त्यस्तै नुवाकोटमा ३ सय ५९, रसुवामा २ सय १, काभ्रेमा ५ सय ४, सिन्धुपाल्चोकमा ३ सय ८५, दोलखामा २ सय ७१, रामेछापमा २ सय ८६, सिन्धुलीमा ३ सय ८१ जना प्रहरी परिचालन गरिएको छ ।
