हेटौँडाः पूर्व–पश्चिम राजमार्ग अन्तर्गत हेटौँडा–१५, रातोमाटे चेकपोष्टबाट मकवानपुर प्रहरीले लागुऔषध गाँजासहित २ जनालाई पक्राउ गरेको छ । पक्राउ पर्नेमा राक्सिराङ गाउँपालिका–१ का २८ वर्षीय जीवन लामा र १६ वर्षीय शुक्लाङ भोलन रहेको बागमती प्रदेश प्रहरी कार्यालय हेटौँडाले जानकारी दिएको छ ।
शुक्रबार बिहान ८ बजेको समयमा प्रहरीले हेटौँडाबाट पथलैयातर्फ जाँदै गरेको बा ३ ख ८३८२ नम्बरको यात्रुवाहक बसलाई सुरक्षाजाँच गर्दा बसमा सवार लामा र भोलन साथबाट लागुऔषध गाँजा बरामद गरेको थियो । प्रहरीले उनिहरुको साथबाट २ किलो ५ सय ग्राम लागुऔषध गाँजा बरामद गरेको थियो । लागुऔषध गाँजासहित दुबैजनालाई नियन्त्रणमा लिई अनुसन्धानका लागि जिल्ला प्रहरी कार्यालय मकवानपुर लगिएको प्रहरीले जानकारी दिएको छ ।
