हेटौंडाः हेटौंडा–२ स्थित सिद्धार्थ माध्यमिक विद्यायलले दुई वर्षदेखि सिटीईभीटीअन्तर्गत् वन विज्ञान (फरेष्ट्री) को डिप्लोमा तहको विद्यार्थी भर्ना स्थगित गरेको छ । फरेष्ट्री विषय अध्ययन गर्ने विद्यार्थी संख्या ज्यादै न्यून भएका कारण नयाँ विद्यार्थी भर्ना स्थगित गरेको विद्यालयका सहायक प्रधानाध्यापक रामशरण अधिकारले बताउनुभयो ।
यसवर्ष सिद्धार्थ माविमा ३ वर्षे डिप्लोमा तहको फरेष्ट्री विषय अध्ययनका लागि ८ जनाले प्रवेश परीक्षा दिएकोमा ५ जनामात्र विद्यार्थी भर्ना भएका थिए । अधिकारीका अनुसार ५ जनालाई मात्र पढाउने अवस्था नभएका कारण विद्यालयले पठनपाठन सुचारु गर्न सकेन । विद्यालयले आगामी वर्ष अन्तिम पटक अध्यापनका लागि प्रयास गर्ने उहाँको भनाइ छ ।
सिद्धार्थ माविले प्राविधिक शिक्षा तथा व्यावसायिक तालिम परिषद् (सिटीईभीटी)सँगको सम्बन्धनमा २०७६ सालदेखि ३ वर्षे डिप्लोमा तहको फरेष्ट्री विषयको पठनपाठन सुरु गरेको थियो । उक्त विषय अध्यनका लागि प्रतिविद्यार्थी एक लाख ६० हजार रुपैयाँ शुल्क निर्धारण गरिएको छ । विद्यालयका सहायक प्रधानाध्यापक अधिकारीले फरेष्ट्री विषयको शुल्क महंगो हुनु विद्यार्थी कम हुनुको एउटा कारण रहेको बताउनुभयो । पहिलो वर्षमा विज्ञान विषयअन्तर्गत्का पाठ्यक्रम रहेको कारण पठाइमा सामान्य विद्यार्थीका लागि गाह्रो हुने र पहिलेजस्तो जागिरको अवसर नआउनेलगायत कारणले विद्यार्थी कम भएका उहाँ बताउनुहुन्छ ।
सुरुवातदेखि नै कम संख्यामा विद्यार्थी पठनपाठन गराउँदै आएको विद्यालयले पछिल्ला वर्ष विद्यार्थी झन् कम हुन थालेपछि पठनपाठन गराउन नसकेको हो । फरेष्ट्री विषयमा पहिलो ब्याचमा १३ जना विद्यार्थी भर्ना भएकोमा ९ जना विद्यार्थी पास आउट भएको अधिकारीले बताउनुभयो । दोस्रो व्याचमा भर्ना भएका १८ जना विद्यार्थीमध्ये तेस्रो वर्षसम्म आइपुग्दा १५ जना विद्यार्थी अध्यनरत थिए । त्यसमध्ये पनि १२ जना विद्यार्थीले मात्र परीक्षा दिएको उहाँले बताउनुभयो ।
विद्यालयले माघ २ गतेदेखि तेस्रो वर्षका १२ जना विद्यार्थीलाई ४ जना शिक्षकद्वारा पढाउने भएको छ । पहिलो वर्षमा फरेष्ट्री विषय अध्यापनका लागि ९ जना शिक्षक हुनुहुन्थ्यो भने दोस्रो र तेस्रो वर्षका लागि ८ जना शिक्षक हुनुहुन्थ्यो । स्थानीय तह र वडाको सहयोगले विद्यालयमा फरेष्ट्री विषय फेरि सञ्चालन हुनसक्ने अधिकारीले बताउनुभयो ।
अधिकारीका अनुसार फरेष्ट्री विषयअन्तर्गत् सिद्धार्थ मावि नेपाल टपसमेत भएको थियो । विद्यार्थीहरुले सिद्धार्थमा ३ वर्ष अध्ययन पूरा गरेपछि बाहिर स्नातक तह पढ्न जान पाउने अधिकारीले बताउनुभयो । हेटौंडामा त्रिभुवन विश्वविद्यालय र कृषि तथा वन विश्वविद्यालयको फरेष्ट्री विषयका कक्षाहरु चलिरहेका कारण विद्यालयले पनि सिटीईभीटीको सम्बन्धनमा फरेष्ट्रीको डिप्लोमा विषय पठनपाठन सुरु गरेको थियो । विद्यार्थीलाई स्नातक पढ्न सहज हुने र विद्यालयले शिक्षक पाउन सजिलो हुने कारणले फरेष्ट्री विषय अध्यापन गराइएको अधिकारीले बताउनुभयो ।
