हेटौंडाः बागमती प्रदेशका मुख्यमन्त्री शालिकराम जम्कट्टेल नेतृत्वको सरकार गठन भएको एक वर्ष पूरा भएको छ । एक वर्ष पूरा भएको सन्दर्भमा बुधबार मुख्यमन्त्री जम्कट्टेलले पत्रकार सम्मेलन गरेर प्रदेश सरकारले गरेका कामको बारेमा जानकारी गराउनुभएको छ । मुख्यमन्त्री जम्कट्टेलले प्रदेश सरकारले स्वास्थ्य क्षेत्रमा उल्लेख्य सुधार गरेको दावी गर्नुभएको छ ।
जनरल वेडलाई निःशूल्क गर्नु, स्वास्थ्य कर्मचारी व्यवस्थापन गर्नुलाई स्वास्थ्यमा क्रान्ति गरेको मुख्यमन्त्री जम्कट्टेलको दावी छ । आफू मुख्यमन्त्री भएपश्चात चालु आर्थिक वर्षमा ३० प्रतिशत खर्च घटाउन सफल भएको बताउँदै मुख्यमन्त्री जम्कट्टेलले प्रदेश सरकारको १४ वटा मन्त्रालयको संख्या घटाएर १२ वटा बनाइएको उल्लेख गर्नुभयो । प्रदेश सरकारले संगठन विस्तार गरी जिल्ला तहमै जनतालाई सेवा दिने काम गरेको उहाँको भनाई छ ।
सरकारले निजामती सेवा ऐन पारित गरी ५ वर्षदेखि रोकिएको कर्मचारी बढुवाको कार्य गरेको जनाएको छ । प्रदेश सरकारले गरेका कामको विवरण उल्लेख गरी पुस्तक नै प्रकाशन गरिएको छ । शिक्षामा आवासीय ढाँचा लागु गरिएको, भौतिक पूर्वाधारतर्फ एक वर्षमा २ सय ७२ किलोमिटर सडक कालोपत्रे गरेको पुस्तकमा उल्लेख छ । प्रदेश सरकारले जनअपेक्षा अनुसार काम गरेको मुख्यमन्त्री जम्कट्टेलले दाबी गर्नुभएको छ । आफू नेतृत्वको प्रदेश सरकारमा विवाद नहुनु पनि उपलब्धीको विषय भएको उहाँको भनाइ थियो । कार्यक्रममा प्रदेश सरकारका मन्त्रीहरु, प्रमुख सचिव, मन्त्रालयका सचिवहरु, नीति तथा योजना आयोगका पदाधिकारीको पनि उपस्थिति रहेको थियो ।
