हेटौंडाः मकवानपुरको मकवानपुरगढी गाउँपालिकाको हिउँदे अधिवेशन आगामी माघको पहिलो सातामा हुने भएको छ । अधिवेशनको तयारीका लागि बुधबार बैठक बसेर निर्णण गर्ने पालिकाका अध्यक्ष दोर्जे लामा स्याङ्तानले बताउनुभयो ।
अधिवेशनमा बजेट संशोधन हुने अध्यक्ष स्याङ्तानले बताउनुभयो । पालिकाले चालु आर्थिक वर्षमा लिएको लक्ष्यभन्दा कम राजस्व संकलन भएपछि केही बजेट संशोधन गर्ने उहाँले बताउनुभयो । पालिकाले उठाउने नदीजन्य पदार्थबाट उठ्ने राजस्व र नियमित दर्ता प्रक्रियाको राजस्व सोचेअनुसार नउठेको उहाँले बताउनुभयो ।
चालु आर्थिक वर्षमा ४ करोड रुपैयाँभन्दा बढी आन्तरिक राजस्व उठाउने लक्ष्य लिए पनि आधा पनि नउठेको उहाँले बताउनुभयो । उहाँले बजेट हुनेसम्म रकमान्तरण गर्ने र आन्तरिक स्रोतबाट अत्यावश्यक नभएको शीर्षकको बजेट कटौती गर्ने सोच रहेको उहाँले बताउनुभयो । पालिकाले चालु आर्थिक वर्षका लागि ६२ करोड २ लाख ५६ हजार रुपैयाँको बजेट ल्याएको थियो ।
जिल्लाका हेटौंडा उपमहानगरपालिका र राक्सिराङ गाउँपालिकाले हिउँदे अधिवेशन सम्पन्न गरेको छ । कैलाश, भीमफेदी, बकैया र इन्द्रसरोवर गाउँपालिकामा आगामी माघ महिनाभित्रमा अधिवेशन गर्ने तयारी भइरहेको जनाइएको छ ।
