हेटौंडाः गत भदौ २७ गते हेटौंडा–१, भिन्तुनापथस्थित सञ्चो हस्पिटलमा डाक्टर कुटपिटको घटनामा संलग्न सबैलाई पक्राउ गर्न नसक्दा मुद्दा प्रक्रिया अघि बढ्न सकेको छैन । अस्पतालको एचडीयु वार्डमा विरामीको उपचारमा संलग्न जनरल फिजिसियन डा. विकास थापा, एनेस्थेसियन डा. प्रशान्त बिडारीलाई सांघातिक आक्रमण गर्ने केही व्यक्ति अझैसम्म अदालतमा हाजिर नहुँदा मुद्दा अघि बढ्न नसकेको हो ।
जिल्ला अदालत मकवानपुरले कुटपिट प्रकरणमा संलग्न रहेका १३ जनाको नाममा पक्राउ पुर्जी जारी गरेकोमा प्रहरीले ६ जनालाई पक्राउ गरी अदालतमा पेश गरेको थियो । चिकित्सकको लापरवाहीका कारण डेंगु संक्रमित हेटौंडा–१२ का ४१ वर्षीय राजेश प्रधानको मृत्यु भएको भन्दै चिकित्सकमाथि सांघातिक आक्रमण भएको थियो । प्रहरीले चिकित्सकमाथि आक्रमण गर्ने मृतककी श्रीमती रमा प्रधान, छोरी रमिला प्रधान, छोरा रोहन प्रधान, भतिज अनुप प्रधान, हेटौंडा–१२, सिक्रेनीका सुवास स्याङ्तान र जीवन लामालाई पक्राउ गरेको थियो ।
पक्राउ परेका ६ जनालाई जिल्ला अदालत मकवानपुरले धरौटीमा रिहा ग¥यो । जिल्ला न्यायाधीश राजेन्द्र अधिकारीको इजलाशले धरौटी माग गर्ने आदेश गरेको थियो । अधिकारीको आदेशमा चिकित्सकमाथि आक्रमण गर्ने रमा प्रधानलाई २ लाख ५० हजार रुपैयाँ धरौटी माग गरिएको थियो भने रमिला, रोहन, अनुप, सुनिल र जीवनलाई जनही २ लाख रुपैयाँ धरौटी माग गर्ने आदेश गरेको थियो ।
अदातलले धरौटीमा रिहा गर्न सकिने आदेशसँगै ६ जना नै धरौटी बुझाएर प्रहरी हिरासतमुक्त भएका छन् । प्रहरीले मुद्दा अदालतमा पेस गरेपश्चात् बिशाल जिम्बा हाजिर भएको र अन्य फरार रहेको जिल्ला अदालत मकवानपुरका श्रेस्तेदार लेखनाथ पौडेलले जनाकारी दिनुभयो । पक्राउ पुर्जी जारी भएका हेटौंडा–१२ का सुरजकुमार भोलन, सुदिन मोक्तान, शिवबहादुर वाइवा, हेटौंडा–१३ का खिलबहादुर भोलन र बलबीर लामा भने अझै फरार रहेका छन् ।
फरार रहेका प्रतिवादी अदालतमा हाजिर नभएसम्म मुद्दा अघि नबढ्ने श्रेस्तेदार पौडेल बताउनुहुन्छ । घटनापश्चात चिकित्सकहरुले अत्यावश्यकबाहेकका सेवा नै बन्द गरेका थिए । यस घटनालाई लिएर स्वास्थ्यकर्मीले देशव्यापी आन्दोलन गरेका थिए । विभिन्न सहमतिपश्चात् आन्दोलन फिर्ता गरी सेवा सुचारु भएको थियो ।
सांघातिक आक्रमणमा परेका जनरल फिजिसियन डा. विकास थापा मकवानपुर फर्किनु भएन । गण्डकी प्रदेशको कास्की जिल्ला घर भएका डा. थापा ९ वर्षदेखि हेटौंडामा कार्यरत हुनुहुन्थ्यो । करिब ५ वर्ष चुरेहिल हस्पिटलमा काम गर्नुभएका डा. थापा सञ्चो हस्पिटल स्थापनाकालदेखि नै हस्पिटलको प्रमुख डाक्टरको रुपमा कार्यरत हुनुहुन्थ्यो । अहिले डा. थापा काठमाडौंमै बसेर काम गर्दै आउनुभएको छ । एनेस्थेसियन डा. प्रशान्त बिडारी भने नियमित काममा फर्कनुभएको छ ।
