हेटौँडाः हेटौँडा उपमहानगरपालिकाकी प्रमुख मीना कुमारी लामा अफ्रिकी मुलुक रुवाण्डा पुग्नुभएको छ । बिल एण्ड मेलिण्डा गेट्स फाउण्डेसनको समन्वय र अन्तर्राष्ट्रिय पानी संगठन (आइडब्लुए) को निमन्त्रणामा मंसिर २४ गते आइतबारदेखि ४ दिनसम्म हुने पानी र विकास सम्मेलन तथा प्रदर्शनीमा सहभागी हुन नगरप्रमुख लामा रुवाण्डाको किगालीमा पुग्नुभएको हेटौँडा उपमहानगरपालिकाको फेसबुक पेजमा उल्लेख गरिएको छ ।
सम्मेलन सुरु हुने दिनमा नगरप्रमुख लामाको सहभागिताको विषयमा सामाजिक सञ्जालमार्फत उपमहानगरपालिकाले सामान्य जानकारी मात्रै राखेको छ । संयुक्त राष्ट्रसंघीय पानी कार्यक्रमको आयोजनामा भएको सम्मेलन तथा प्रदर्शनीमा नगरप्रमुखको सहभागिताको उद्देश्य, लक्ष्य र नगरप्रमुखको उपस्थितिले हुने लाभका विषयमा केही पनि उल्लेख गरिएको छैन । नगरप्रमुख कुन दिन रुवाण्डा प्रस्थान गर्नुभयो भन्ने पनि यकिन विवरण उल्लेख गरिएको छैन । नगरप्रमुखको वैदेशिक भ्रमणको विषयमा औपचारिक जानकारी समेत गराइएको छैन । फेसबुक पेज “हेल्लो हेटौँडा उपमहानगरपालिका” मा नगरप्रमुख लामासहित ६ जनाको फोटो समावेश गरिएको छ । फोटोमा देखिने व्यक्तिहरु को–को हुन् भन्ने पनि स्पष्ट छैन । नगरप्रमुख लामा फोटोको छेउमा उभिनुभएको हिसाबले उहाँसँग रुवाण्डा जाने व्यक्तिहरु उच्च पदस्थ हुनुहुन्छ भन्ने अनुमान लगाउन सकिन्छ ।
नगरप्रमुख लामा मंसिर १६ गतेदेखि २१ गतेसम्म चीनको भ्रमण गरेर फर्कनु भएको थियो । चीन भ्रमणको विषयमा पनि उपमहानगरपालिकाले कुनै किसिमको औपचारिक विवरण सार्वजनिक गरेको छैन । बागमती प्रदेश प्रमुख यादवचन्द्र शर्मासँग चीन जानुभएकी नगरप्रमुख लामा चीनबाट फर्के लगत्तै रुवाण्डा प्रस्थान गर्नुभएको अनुमान गर्न सकिन्छ । मंसिर २१ गतेसम्म चीनको भ्रमणमा रहनुभएकी लामा मंसिर २४ गतेदेखि सुरु हुने सम्मेलनमा सहभागी हुन रुवाण्डा जानुभएको हो ।
नगरप्रमुखमा निर्वाचित हुनु भएयता लामाले युरोपेली मुलुक नेदरल्याण्ड्ससँगै एसियाली मुलुक मलेसिया, चीन हुँदै अफ्रिकी मुलुक रुवाण्डाको भ्रमण गरिरहनुभएको छ । नगरप्रमुखको हालसम्मको भ्रमणको औपचारिक जानकारी, भ्रमणको उद्देश्य र लाभको विषयमा कुनै किसिमको समीक्षा हुन सकेको छैन । नगरप्रमुखको भ्रमणको विषयमा उपमहानगरपालिकाको कुनै पनि तहले औपचारिक र अनौपचारिक जानकारी दिने प्रचलन छैन ।
