हेटौँडाः अन्तर्राष्ट्रिय दातृ निकाय प्लान नेपालको सहयोगमा सामुदायिक विकास संस्था (सिडिओ) नेपाल मकवानपुरले मकवानपुर जिल्लामा ४५ वटा नमूना कक्षाकोठा निर्माण गरेको छ । सन् २०२२ को जुलाईदेखि एक वर्षे कार्यक्रमअन्तर्गत मकवानपुरको बागमती, मनहरी र मकवानपुरगढी गाउँपालिका र हेटौँडा उपमहानगरपालिकाका २४ वटा विद्यालयमा २९ वटा नमूना कक्षाकोठा निर्माण गरिएको हो । प्रारम्भिक बालविकास कक्षादेखि २ कक्षासम्मका कक्षाकोठालाई बालमैत्री र आकर्षक बनाउन सहयोग गरिएको सिडिओ नेपाल मकवानपुरका कार्यक्रम संयोजक अर्जुन खड्काले जानकारी दिनुभएको छ ।
नमूना कक्षाकोठामा भुइँ इन्सुलेटर राखेर जुट कार्पेट राखी बच्चाबच्चीका लागि सुरक्षित र न्यानो बनाइन्छ भने आवश्यकताअनुसार चकटीको पनि व्यवस्था मिलाउने गरिएको छ । कक्षाकोठामा विभिन्न रंगका कागजका फुलहरु बनाएर झिलिमिली बनाइन्छ भने बालबालिकाका लागि उपयुक्त टेवल, टिभि पनि राखिदिने गरेको छ । टिभिमा बालबालिकालाई श्रव्यदृश्य सामग्री देखाएर सिक्ने वातावरण बनाउने गरिन्छ । यस्तै कक्षाकोठाका भित्तालाई पुस्तकको पाना जस्तै अक्षर, शब्द लेखेर सिंगार्ने गरिएको छ ।
सिडिओ नेपालले बालमैत्री एवम् आकर्षक कक्षाकोठा निर्माणसँगै शिक्षकलाई क्षमता विकासका लागि तालिमको पनि आयोजना गरेको छ । मकवानपुरगढीको भानु मावि र जालपादेवी माविमा महिनावारी हुँदा आराम गर्ने कक्ष पनि निर्माण गरिएको छ । केही विद्यायमा टिभि, स्पिकर, स्ट्रेचर प्रदान गरिएको कार्यक्रम संयोजक खड्काले जानकारी दिनुभयो । ३, ४ हजार रुपैयाँको अभावमा विद्यालयको भौतिक संरचनाको मर्मत, सम्भार हुन नसकिरहेको अवस्थाका विद्यालयदेखि एक लाख २० हजार रुपैयाँसम्म सहयोग गरेर सिडिओले नमूना कक्षाकोठा तयार पारेको संयोजक खड्काले बताउनुभयो ।
सिडिओ नेपालले मकवानपुरगढीमा १२ वटा विद्यालयमा २९ वटा नमूना कक्षाकोठा निर्माण गरिदिएको छ भने मनहरी गाउँपालिकामा ९ वटा, हेटौँडा उपमहानगरपालिकामा ४ वटा र बागमती गाउँपालिकामा ३ वटा कक्षाकोठा निर्माण गरिदिएको छ । विद्यार्थीमैत्री विद्यालय निर्माण गर्ने क्रममा खेलमैदान मर्मत गर्ने काम पनि भएको छ । बागमती गाउँपालिकाको गीता आधारभूत विद्यालयमा खेलमैदान निर्माणमा मात्रै ८१ हजार रुपैयाँ खर्च भएको कार्यक्रम संयोजक खड्काले बताउनुभयो ।
विद्यालयका कक्षाकोठा आकर्षक र बालमैत्री बनाउँदा विद्यार्थीहरुको सिकाई प्रभावकारी भएको, विद्यार्थीको संख्या बढेको, विद्यालयका ससाना समस्या समाधान भएको सिडिओ नेपालका कार्यकारी निर्देशक जंगबहादुर बिक बताउनुहुन्छ । वडाहुँदै पालिकाको सिफारिसमा विद्यालय छनोट गरी विद्यालयको भौतिक सुधार तथा शिक्षकहरुको क्षमता विकासको कार्य गरिएको उहाँले बताउनुभयो ।
