हेटौंडाः बागमती प्रदेशको राजधानी हेटौंडा उपमहानगरपालिकाको प्रमुख निर्वाचित हुनुभएपछि मीना कुमारी लामाले पहिलो निर्णय थियो सडक क्षेत्रमा रहेका विद्युतको पोललाई सडकभन्दा बाहिर सार्ने । जनप्रतिनिधिले पदभार गरेको बर्षदिन पुग्न लाग्दा समेत पहिलो निर्णय कार्यान्वयन हुन सकेको छैन । विद्युतको पोल सार्ने निर्णय कार्यान्वयन गर्न नसकेको स्थानीय सरकारको मंगलबार बसेको कार्यपालिकाको बैठकले हेटौंडा बजारक्षेत्रको विद्युतीय तार भूमिगत गर्ने विषयमा अध्ययन गर्ने निर्णय भएको छ ।
विद्युतको तारलाई भूमिगत गर्ने विषयमा अध्ययन गर्ने निर्णय भएको नगर प्रमुख मीना कुमारी लामाले जानकारी दिनुभयो । मंगलबार बसेको उपमहानगरको २० औं कार्यपालिका बैठकले हेटौंडाको मुख्य बजार क्षेत्रको रुपमा रहेको १, २, ४, ५ र १० नम्बर वडा क्षेत्रको विद्युतको तारलाई भूमिगत गर्ने निर्णय विषयमा अध्ययन गर्ने निर्णय भएको नगर प्रमुखको सचिवालयले जनाएको छ । तार व्यवस्थापनका लागि नेपाल विद्युत प्राधिकरणलाई कार्यपालिकाको बैठकको निर्णयसहित सिफारिस पत्र पठाउने तयारी भएको उपमहानगरले जनाएको छ ।
बैठकले हेटौंडा उपमहानगरलाई उज्यालो शहरको रुपमा विकास गर्नका लागि नगरका विभिन्न ठाउँमा ‘हाइ मास्ट लाइट’ राख्ने निर्णय गरेको सचिवालयले जनाएको छ । उपमहानगरका १९ वटै वडालाई लक्षित गर्दै लाईटको व्यवस्थापनका लागि नेपाल विद्युत प्राधिकरणसँग छलफल भैरहेको जनाएको छ । बजारसहित नगरका सबै वडालाई समेटेर लाइटको व्यवस्थापनका लाग्ने निर्णय भएको उपमहानगरपालिकाका प्रमुख मीना कुमारी लामाले जानकारी दिनुभएको छ । पहिलो चरणमा उपमहानगरले हाइ मास्ट लाइटका लागि ६० लाख रुपैयाँ बजेट छुट्याएको नगर प्रमुखको सचिवालयले जनाएको छ । पहिलो चरणमा २५ वटा १० देखि १६ मिटर उचाई भएका लाईटको माग गर्ने तयारी उपमहानगरले गरेको बताइएको छ ।
कार्यपालिका बैठकले उपमहानगरको सीमा क्षेत्रमा ४ स्थानमा सार्वजनिक शौचालय निर्माण गर्ने निर्णय गरेको छ । बैठकले नगरको पुर्वमा १८, पश्चिममा १९, दक्षिणमा १५ र उत्तरमा १ नम्बर वडा क्षेत्रको पायक पर्ने स्थानमा आवतजावत गर्ने नागरिकको सुविधाका लागि शौचालय निर्माण गर्ने निर्णय गरेको हो । त्यस्तै न्यून आय भएका गरीब तथा विपन्न ६ सय ६३ परिवारको निःशुल्क स्वास्थ्य बीमा गर्ने निर्णय गरेको छ । नगरस्तरीय स्वास्थ्य बीमा लाभग्राही छनौट समितिले २०७९ फागुन ११ गते गरेको निर्णयबाट भएको सिफारीस अनुसार उनिहरुको स्वास्थ्य बीमा गर्ने निर्णय भएको नगर प्रमुखको सचिवालयले जनाएको छ ।
बैठकले सार्वजनिक पूर्वाधार सम्पत्ती संरक्षण, उपमहानगरको पाठ्यक्रम निर्माण तथा कार्यान्वयन कार्यविधि २०७७ संशोधन, बाटो सार्वजनिक, घर नक्सा अभिलेखीकरण तथा नियमित गर्ने, अनलाईन नक्सापाससहित विभिन्न खेलमैदान निर्माण सम्बन्धी निर्णय भएको बताइएको छ ।
