हेटौंडाः मकवानपुरको बागमती गाउँपालिकामा सञ्चालन भएको पालिकास्तरीय राष्ट्रपति रनिङशिल्ड प्रतियोगिताको उपाधी बागमती–८ स्थित जनता माविले जितेको छ । सोमबार सम्पन्न प्रतियोगितामा १२ स्वर्ण, ७ रजत र ९ कास्यसहित जनता माविले उपाधी जितेको हो ।
जितसँगै जनता माविले ३० हजार रुपैयाँसहित ट्रफी प्राप्त गरेको छ । यस्तै, बागमती–५ स्थित देवकी मावि द्वितीय भएको छ । देवकीले १० स्वर्ण, ४ रजत र ६ कास्य जितेको हो । द्वितीय भएको देवकीले नगद २० हजार रुपैयाँ र ट्रफी प्राप्त गरेको छ । यस्तै बागमती–१ स्थित सूर्य मावि ७ स्वर्ण, ११ रजत र ७ कास्यसहित तृतीय भएको छ । सूर्य माविलाई नगद १० हजार रुपैयाँ र ट्रफी प्रदान गरिएको छ । बागमती–२ स्थित बागमती माविले ३ स्वर्ण, ५ रजत र १ कास्यसहित सान्त्वना भएको छ । बागमती–७ स्थित चौरा आधारभूत विद्यालयले ३ स्वर्ण, १ रजत जितेको छ ।
प्रतियोगिताको सर्वाेत्कृष्ट खेलाडी देवकी माविकी निमा स्याङ्बो घोषित भइन् । यस्तै, ट्रयाकतर्फको उत्कृष्ट खेलाडी सूर्य माविकी आरती बोम्जन र फिल्डतर्फको उत्कृष्ट खेलाडी सूर्य माविकै मेरिशा राई घोषित भइन् ।
