हेटौंडाः आसन्न स्थानीय तहको निर्वाचनका लागि उम्मेदवारी दर्ता गराएकामध्ये मकवानपुर जिल्लाका १० स्थानीय तहबाट १ सय ३५ जनाले शुक्रबार उम्मेदवारी फिर्ता गरेका छन् । मकवानपुर जिल्लाका १० वटै पालिकामा १ हजार ९ सय ३२ जनाको उम्मेदवारी कायम भएको छ ।
उम्मेदवारी फिर्ता गर्नेमा हेटौंडा उपमहानगरपालिकामा मेयरमा ३ जना, उपमेयरमा २ जनासहित ४९ जना रहेको निर्वाचन अधिकृतको कार्यालयले जनाएको छ । ४९ जनाले उम्मेदवारी फिर्ता लिएसँगै हेटौंडा उपमहानगरपालिकामा ३ सय ८८ जनाको उम्मेदवारी कायम भएको छ । थाहा नगरपालिकामा वडा अध्यक्ष र वडा सदस्य गरी १५ जनाले उम्मेदवारी फिर्ता लिएसँगै २ सय ४० जनाको उम्मेदवारी कायम भएको निर्वाचन अधिकृतको कार्यालयले जनाएको छ ।
बकैया गाउँपालिकामा अध्यक्षका उम्मेदवार २ जनासहित १८ जनो उम्मेदवारी फिर्ता लिएसँगै २ सय ३४ जनाको उम्मेदवारी कायम भएको छ । ईन्द्रसरोवर गाउँपालिकामा अध्यक्षका आकांक्षी २ जना, वडा अध्यक्षका आकांक्षी ४ जना र वडा सदस्यका आकांक्षी २ जनासहित ८ जनाको उम्मेदवारी फिर्ता भएर ८९ जनाको उम्मेदवारी कायम रहेको छ ।
यता बागमती गाउँपालिकामा ५ जनाको उम्मेदवारी फिर्ता भएर १ सय ६७ जनाको उम्मेदवारी कायम छ । भीमफेदी गाउँपालिकामा एकजनाको उम्मेदवारी फिर्ता भएर १ सय ३५ जनाको उम्मेदवारी कायम छ । मकवानपुरगढी गाउँपालिकामामा ११ जनाको उम्मेदवारी फिर्ता भएर १ सय ३४ जनाको उम्मेदवारी कायम छ । यसैगरी राक्सिराङ गाउँपालिकामा अध्यक्षका आकांक्षी १ जनासहित २१ जनाले उम्मेदवारी फिर्ता लिँदा १ सय ५१ जनाको उम्मेदवारी कायम छ । कैलाश गाउँपालिकामा ३ जनाको उम्मेदवारी फिर्ता हुँदा १ सय ७३ जनाको उम्मेदवार कायमै छ । मनहरी गाउँपालिकामा अध्यक्षका आकांक्षी २ जना, उपाध्यक्षका आकांक्षी १ जना र वडा अध्यक्षका आकांक्षी १ जनाको उम्मेदवारी फिर्ता भएर २ सय २१ जनाको उम्मेदवारी कायमै रहेको निर्वाचन अधिकृतको कार्यालयले जनाएको छ ।
