हेटौंडाः नेपाली कांग्रेसको १४ औं महाधिवेशनअन्तर्गत सभापति पदका लागि दोस्रो चरणको निर्वाचनमा सभापति पदका उम्मेदवार ईन्द्रबहादुर बानियाँलाई भीमसेन दास प्रधानले सहयोग गर्ने भएको छ । पहिलो चरणको निर्वाचनमा तेस्रो स्थानमा रहनुभएका प्रधानले पहिलो स्थानमा रहनुभएका बानियाँलाई सहयोग गर्ने घोषणा गर्नुभएको हो ।
नेपाली कांग्रेको विधानअनुसार सभापति पदमा निर्वाचित हुन ५१ प्रतिशत मत ल्याउनुपर्ने हुन्छ । बागमती प्रदेश समितिको सभापति पदका लागि शनिबार भएको मतदानमा २ हजार ८३ मत खस्दा ईन्द्रबहादुर बानियाँले पहिलो स्थानमा रहँदै ९ सय ९२ मत प्राप्त गर्नुभयो भने दोस्रो स्थानमा रहनुभएका जगदिश्वर नरसिंह केसीले ८ सय ७२ मत प्राप्त गर्नुभएको थियो । तेस्रो स्थानमा रहनुभएका प्रधानले १ सय ९७ मत प्राप्त गर्नुभयो । दोस्रो चरणको निर्वाचन आइतबार बिहान ११ः३० बजेबाट सुरु गर्ने निर्वाचन समितिले जनाएको छ ।
