हेटौंडाः मकवानपुरको राप्ती रिभर युवा क्लब (आरआरवाइसी) सी डिभिजन लिग छनोट प्रतियोगिताको समुह चरणबाट नै बाहिरिएको छ । समुह चरणको पहिलो खेलमा जीत र दोस्रो खेलमा पराजित भएको आरआरवाइसी छनोट प्रतियोगिताको दोस्रो चरणमा प्रवेश गर्न रोकिएको हो ।
एन्फा कम्प्लेक्समा शुक्रबार बिहान बाजुराको रानीवन स्पोर्टस् क्लब र सिन्धुपाल्चोकको चौतारा स्पोर्टस् क्लबबीच भएको खेल गोलरहित बराबरीमा सकिएपछि सोही समुहमा रहेको आरआरवाइसी प्रतियोगिताबाट बाहिरिएको छ । आरआरवाइसीले आफ्नो पहिलो खेलमा चौतारालाई ५–१ गोलअन्तरले पराजित गर्दै ३ अंक जोडेको थियो भने दोस्रो खेलमा रानीवनसँग ३–२ गोलअन्तरले पराजित भएको थियो । जसकारण आरआरवाइसीले रानीवन र चौताराबीचको खेलमा भर पनुपर्ने अवस्था आएको थियो ।
शुक्रबारको खेलपश्चात् रानीवन स्पोर्टस् क्लब ४ अंकसहित समुह बिजेता बन्दै छनोट प्रतियोगिताको दोस्रो चरणमा प्रवेश गरेको छ । ३ अंक रहेको आरआरवाइसीसँगै १ अंक जोडेको चौतारा स्पोर्टस् क्लब पनि समुह चरणबाट नै बाहिरिएको छ ।
