हेटौंडाः जिल्ला निर्वाचन कार्यालय मकवानपुरमा मनहरी गाउँपालिका उपाध्यक्ष मनिला बिष्टको राजीनामा स्वीकृत भएको स्पष्ट जानकारी र पद खाली भएको कुनै पनि जानकारी नआएको निर्वाचन कार्यालय मकवानपुरका प्रमुख गोविन्द पौडेलले जानकारी दिनुभएको छ । उहाँले मनहरी गाउँपालिकाले उपाध्यक्ष मनिला बिष्टले राजीनामा दिएको जानकारीसहित राजीनामापत्र कार्यालयमा नआएको जानकारी दिनुभयो ।
स्पष्टरुपमा निर्वाचन कार्यालयमा राजीनामा स्वीकृत भएको भनेर जानकारी नआएका कारण उपनिर्वाचन नहुने कार्यालय प्रमुख पौडेलले बताउनुभयो । निर्वाचित जनप्रतिनिधिको पदावधि एक वर्षभन्दा बढी बाँकी भएमा उपनिर्वाचन गराउनुपर्ने भए पनि स्पष्टरुपमा पद खाली भएको जानकारी नआएको उहाँको भनाइ छ ।
नेपालको संविधानको भाग १७ को धारा २१५ को उपधारा ९ मा स्थानीय तहका अध्यक्ष वा उपाध्यक्षको एक वर्षभन्दा बढी पदावधि बाँकी रहेको अवस्थामा पद रिक्त हुन गएमा बाँकी अवधिका लागि रिक्त पदको पूर्ति उपर्निवाचनद्वारा हुनेछ भन्ने व्यवस्था रहेको छ । तर स्पष्टरुपमा राजीनामा स्वीकृत र पद रिक्त भएको जानकारी नआएका कारण उपनिर्वाचन नहुने निर्वाचन प्रमुख पौडेलले बताउनुभयो ।
यस्तै, मनहरी गाउँपालिका वडा नम्बर ३ को वडा अध्यक्षको मृत्यु भएपछि वडा अध्यक्षको पद पनि रिक्त रहेको छ । यस्तो अवस्थामा भने स्थानीय कार्यपालिका सञ्चालन ऐनमा कुनै पनि व्यवस्था नभएकाले वडा अध्यक्षको उपनिर्वाचन गराउने नगराउने निर्वाचन आयोग नै अन्यौलमा छ । तर, स्थानीय तहका प्रमुख र उपप्रमुखको भने उपनिर्वाचन हुनसक्ने ऐनमै स्पष्ट छ । यता, मनहरी गाउँपालिका अध्यक्ष एकराज उप्रेतीले उपाध्यक्षको राजीनामाबारे निर्वाचन आयोगलाई जानकारी गराएको बताउनुभएको छ । उपनिर्वाचन हुनेबारे भने अझै अन्यौलता रहेको उहाँको भनाइ छ ।
यसैगरी विगत एक वर्षदेखि मकवानपुरको भीमफेदी ८ नम्बर वडामा पनि वडा अध्यक्ष पद रिक्त रहेको छ । वडा अध्यक्षले गाउँपालिकामा राजीनामा बुझाए पनि राजीनामा स्वीकृत गर्ने अधिकारी कसको भनेर ऐनमा नहुँदा स्वीकृत हुन नसकेको गाउँपालिकाले जनाएको छ । यसबारे निर्वाचन आयोगलाई जानकारी गराइए पनि स्पष्ट राजीनामा स्वीकृत भएर पद रिक्त भएको पत्र नआउँदा उपनिर्वाचन हुनसक्ने अवस्था नरहेको निर्वाचन आयोग मकवापनुरका प्रमुख पौडेल बताउनुहुन्छ ।
